नेपाली चलचित्र क्षेत्रको प्राविधिक क्षमता अभिवृद्धितर्फ महत्वपूर्ण मानिएको प्रोस्थेटिक मेकअप तालिम सम्पन्न भएको छ । चलचित्र विकास बोर्डको आयोजना तथा लाइट बेन्डर्सको संयोजनमा सञ्चालन गरिएको उक्त तालिमका २६ जना सहभागीलाई प्रमाणपत्र वितरण गरिएको हो ।
तालिम समापन तथा प्रमाणपत्र वितरण कार्यक्रममा अध्यक्ष दिनेश डिसीको साथमा चर्चित कलाकार गौरी मल्ल र बिपिन कार्की विशेष अतिथिका रूपमा सहभागी भएका थिए । उनीहरूको उपस्थितिले कार्यक्रममा थप गरिमा थप्नुका साथै सहभागीहरूलाई उत्साह र प्रेरणा प्रदान गरेको थियो ।
विशेष मेकअप प्रविधिसँग सम्बन्धित यो तालिमले नेपाली चलचित्र क्षेत्रमा चरित्र निर्माण, दृश्यको यथार्थता र प्रस्तुतीकरणको गुणस्तर उकास्न टेवा पुग्ने विश्वास लिइएको छ । चलचित्र निर्माणमा प्रोस्थेटिक मेकअपको प्रयोगले कलाकारलाई पात्रअनुसार विश्वसनीय रूपमा प्रस्तुत गर्न महत्वपूर्ण भूमिका खेल्ने भएकाले यस्ता तालिमहरूलाई नेपाली चलचित्रको भविष्यसँग जोडेर हेरिएको छ ।
प्रमाणपत्र प्राप्त गर्ने २६ जना सहभागी अब नेपाली चलचित्र क्षेत्रका लागि नयाँ प्राविधिक सम्भावना र दक्ष जनशक्तिका रूपमा अगाडि आउने अपेक्षा गरिएको छ । चलचित्र विकास बोर्डले यस्ता सीपमूलक तथा प्रविधिमैत्री तालिममार्फत नेपाली चलचित्रलाई अझ व्यावसायिक, प्रतिस्पर्धी र अन्तर्राष्ट्रिय स्तरको बनाउन निरन्तर पहल गरिरहेको जनाएको छ ।
नेपाली चलचित्रमा अहिले केवल कथा र अभिनय मात्र होइन, प्रविधि, दक्षता र व्यावसायिक तयारीको आवश्यकता झन् तीव्र रूपमा महसुस भइरहेको बेला प्रोस्थेटिक मेकअप जस्तो विशिष्ट विधामा तालिम सम्पन्न हुनुलाई चलचित्र उद्योगमा एक ईंटा थपिएको मानिएको छ ।
