-कृष्ण पाण्डे ‘कृष’
अर्जुन पोखरेलको शब्द तथा सङ्गीत रहेको नयाँ गीत ‘मनको धनी’ को भिडिओ सार्वजनिक भएको छ । भिडिओमा जात, धर्म र धनको पर्खालले साँचो प्रेमलाई छेक्दैन भन्ने सन्देश दिईएको छ l दुई फरक धर्म बिचमा भएको प्रेम र मिलनपछि जन्मिएको बच्चाको सुन्दर कहानी समेटिएको यस गीतमा दुर्गा खरेल, सैराज खाती र अनुजा कडरियाको स्वर रहेको छ । गीतमाथि बनेको भिडिओमा जात र धर्मभन्दा मानवता ठूलो भन्ने विषयलाई प्रस्तुत गरिएको छ ।
भौतिक सम्पन्नता भन्दा मनको सम्पन्नताको वकालत गर्ने यस गीतको भिडिओमा उमर खान, मेलिना पन्त, अभिलाषा सापकोटा र राजेन्द्र आचार्यको अभिनय रहेको छ । गीतको छायाङ्कन नवराज उप्रेतीले गरेका हुन् भने सम्पादन विकास दाहालको रहेको छ । अर्जुन पोखरेल स्वयंले निर्देशन गरेको यस भिडिओमा दुई धर्म बिचमा भएको प्रेममा सधैं फाटो आइरहेको, एउटाले अर्कोलाई स्वीकार्ने अवस्था नरहेको र त्यस्को मध्यमार्गी धार प्रस्तुत गरिएको छ l भिडिओमा समस्या मात्रै देखाइएको छैन, समाधानको विषयलाई पनि सुन्दर शैलीमा प्रस्तुत गरिएको छ । गीत डिभाइन म्युजिक नामक युट्युब च्यानलमार्फत् सार्वजनिक गरिएको हो । चलचित्र सङ्गीतमा सर्वाधिक रुचाइएका सङ्गीतकार अर्जुन पोखरेलका सुगम सङ्गीत पनि उत्तिकै लोकप्रिय हुने गरेका छन् ।
