प्रतिष्ठित सङ्गीतकार,गायक तथा लेखक प्राज्ञ सङ्गीतकार शान्तिराम राईको एकल साङ्गीतिक साँझ हुने भएको छ । खोटाङ कलाकार समाजले स्रष्टा सम्मानमा पहिलोपटक आयोजना गर्न लागेको राईको एकल साङ्गीतिक साँझ आगामी मङ्सिर १३ गते काठमाण्डौमा हुने खोटाङ कलाकार समाजका अध्यक्ष रुपकुमार राईले बताए ।
काठमाडौमा आयोजित प्रेस मिटमा खोटाङका अग्रज कलाकारहरुको सम्मानार्थ नियमित रुपमा वार्षिक एकल साङ्गीतिक साँझ कार्यक्रम गर्ने उद्देश्य लिएर खोटाङ कलाकार समाज अगाडि बढेको कुरा रुपकुमारले बताए । प्रेसमिटमा बोल्दै सङ्गीतकार शान्तिराम राईले आफ्नो सङ्घर्ष र नेपाली सङ्गीत क्षेत्रमा दिएको योगदान बुझेर एकल साङ्गीतिक साँझको आयोजना गर्न लागेकोमा आयोजक संस्था खोटाङ कलाकार समाजलाई धन्यवाद दिए । उनले भने- ‘जीवन नै सङ्गीतमा समर्पण गरेको मान्छे हो म, र बाँकी जीवन पनि सङ्गीतमै रहने छु । यो शान्तिराम राईको मात्र एकल शो होइन, हामी सबै खोटाङ्गेहरुको हो । भोलि यो शो डुब्यो भने सबै खोटाङ्गेहरुको शिर झुक्छ होला ।’
प्रेसमिटमा शान्तिराम राईको एकल साङ्गीतिक साँझलाई दिक्तेल रुपाकोट मझुवागढी नगरपालिकाका मेयर तीर्थराज भट्टराई, सांसद बिशाल भट्टराई, नेता विष्णु राई, व्यावसायी टंक श्रेष्ठ लगायतले शुभकामना दिएका थिए । शान्तिराम राई रेडियो नेपालमा २०४६ सालमा लोकगीततर्फ स्वरपरीक्षा उत्तीर्ण गरि नेपाली साङ्गीतिक क्षेत्रमा निरन्तर ३६ वर्षदेखि सङ्गीत सिर्जनामै व्यस्त रहँदै आएका छन् । हालसम्म पन्ध्रसय भन्दा बढी सङ्गीत सृजना गरिसकेका शान्तिरामको एकल साँझमा ‘तिमी तारे भीर म त लहरा’, ‘धोका दियौ तिमीले’, ‘छालहरु ओ छालहरु’, ‘आईडी काडैले’ र ‘ए पहराकी फूल’ लगायतका उनका सदावहार गीतहरु प्रस्तुत हुनेछन् । कार्यक्रममा शान्तिरामद्वारा सङ्गीतवद्ध गीत दीप श्रेष्ठ, सुक्मित गुरुङ, पवित्रा सुब्बा, राजेशपायल राई, मेलिना राई लगायतका नयाँ–पुराना पुस्ताका गायक गायिकाहरु मार्फत प्रस्तुति हुने आयोजकले जानकारी दिएका छन् ।
२०७७ सालमा स्थापना भएको खोटाङ कलाकार समाजले खोटाङकै इतिहासमा पहिलोपटक प्रज्ञा भवन कमलादी, काडमाडौमा ‘खोटाङ साङ्गीतिक साँझ २०७९’ को आयोजना गरेको थियो । जसमा १०० जना गायक गायिकाले गायन र १०० जना नृत्याङ्गगनाहरुले नृत्य प्रस्तुत गरेका थिए । समाजले खोटाङका १० ओटै पालिकाहरुमा गायन र नृत्य प्रतियोगिताको आयोजना गरी पालिका प्रतिभाहरुको समेत छनोट गरि पुरस्कृत गरेको थियो ।
‘मुस्कुराउँछ सधैंभरि मेरो खोटाङ’ बोलको गीत सार्वजनिक
कार्यक्रममा खोटाङ कलाकार समाजद्वारा निर्माण गरिएको ‘मुस्कुराउँछ सधैंभरि मेरो खोटाङ’ बोलको गीत पनि सार्वजनिक गरिएको थियो । खोटाङका एक सय एघार जना कलाकारहरुको स्वर रहेको यस गीतमा गीतकार टंक भट्टराईको शब्द, महेश खड्काको सङ्गीत र देबेश राईको म्युजिक एरेन्ज रहेको छ। यो म्युजिक भिडिओ राजेश पुमा राईले निर्देशन गरेका हुन्। भिडिओ दिक्तेल रुपाकोट मझुवागढी नगरपालिका, खोटेहाङ गाउँपालिका र ऐंसेलुखर्क गाउँपालिकाको आर्थिक सहयोगमा निर्माण भएको बताइएको छ ।
